.संक्षेपमा.
- फिनिस नेपाली समाजको दशैं-तिहार सांस्कृतिक कार्यक्रम भव्यरूपमा सम्पन्न।
- फिनल्यान्डमा बसोबास गर्ने नेपालीहरूको उल्लेख्य उपस्थिति।
- अतिथी कलाकार, पञ्चेबाजा र भैलो प्रस्तुति मुख्य आकर्षण।
फिनिस नेपाली समाजले आयोजना गरेको दसैँ–तिहार विशेष कार्यक्रम २०८२ हेलसिन्कीमा भव्यताका साथ सम्पन्न भएको छ।
हिजो शनिवार साँझ ५ बजे सुरु भएर करिब चार घण्टा चलेको उक्त कार्यक्रममा अतिथि कलाकार लोक गायक सूर्य खड्काले प्रस्तुति दिएका थिए भने भैलो नाच, पञ्चेबाजा लगायतका मौलिक प्रस्तुतिहरू रहेका थिए।
फिनल्यान्डमा बसोबास गर्ने नेपालीहरूको उल्लेख्य उपस्थिति रहेको उक्त कार्यक्रमले “परदेशमा पनि हाम्रो संस्कृति, हाम्रो गौरव” भन्ने सन्देशलाई सार्थक तुल्याउने प्रयास गरेको फिनिस-नेपाली समाजका सचिव सुरज भट्टराईले नेपालीलाइनेनलाई बताए।
कार्यक्रममा भान्ता नगरपालिकाका नगर सदस्य शेखर आचार्य, समाजका सल्लाहकार नन्दनान्दन भट्टराई (नवीन), एनआरएनए फिनल्यान्डका उपाध्यक्ष विष्णु अर्याल, पशुपतिनाथ मन्दिर फिनल्यान्डका व्यवस्थापन समिति अध्यक्ष पुनाराम भण्डारी लगायतका अतिथिहरूको उपस्थिति थियो। नेपालबाट फिनल्यान्ड भ्रमणमा आएकाहरू पनि कार्यक्रममा सहभागी थिए।
अतिथिहरूले आफ्नो शुभकामना मन्तव्यमा विदेशमा नेपाली संस्कृति संरक्षणमा समाजले पुर्याएको योगदानको प्रशंसा गरेका थिए।
समाजका वरिष्ठ उपाध्यक्ष होम ब. कँडेल (हरि) ले स्वागत मन्तव्य दिँदै आफूहरू हजारौँ किलोमिटर टाढा भए पनि मन र माटो भने नेपालमै रहेको बताएका थिए।
उनले दसैँ र तिहारजस्ता चाडहरू पहिचानका प्रतीक रहेको बताउँदै कार्यक्रममा उपस्थित सबैको अनुहारमा देखिएको मुस्कानले नेपालीपन जोगाउने आफूहरूको प्रयास सफल भएको महसुस भएको बताएका थिए।
कार्यक्रमको समापनमा बोलेकी समाजकी अध्यक्ष रुक्मिणी भट्टराईले कार्यक्रम सफल पार्न सहयोग गर्ने सबैलाई धन्यवाद दिएकी थिइन्।
“यो कार्यक्रम हाम्रा लागि मात्र होइन, फिनल्यान्डमा रहेका सम्पूर्ण नेपालीहरूका लागि गर्वको क्षण हो।” भट्टराईले भनिन्। “हाम्रो एकताको भावना नै हाम्रो सबैभन्दा ठुलो शक्ति हो र यस्ता पर्वहरूले हाम्रो आत्मीय सम्बन्धलाई जोगाउने काम गर्दछन्।”
कार्यक्रममा प्रस्तुत गरिएको परम्परागत भैलो नाचले नेपालको पश्चिम पहाडी भैलोकै झल्को दिएको थियो।
मुख्य आकर्षणः अतिथी कलाकार, पञ्चेबाजा र भैलो प्रस्तुति
कार्यक्रममा विविध सांस्कृतिक प्रस्तुतिहरूले माहौललाई उत्सवमय बनाएको थियो। अतिथि कलाकार लोक गायक सूर्य खड्काको प्रस्तुति कार्यक्रमको मुख्य आकर्षणहरू मध्ये एक रह्यो।
स्थानीय कलाकारहरूको नृत्य, हास्य प्रस्तुति, परम्परागत भैलो र पञ्चेबाजाको धुनमा सहभागीहरू रमाएका थिए।
कार्यक्रममा प्रस्तुत गरिएको परम्परागत भैलो नाचले नेपालको पश्चिम पहाडी भैलोकै झल्को दिएको थियो। नेपालमै जसरी नाङ्लोमा दियो, चामल, सेल र फिनी रोटी र पैसा राखेर दक्षिणा पनि दिइएको थियो।
कार्यक्रममा सहभागी कलाकारहरूलाई मायाको चिनो र प्रशंसा पत्र प्रदान गरी सम्मान गरिएको थियो।
संस्थाले कार्यक्रम सफल पार्न सहयोग गर्ने स्वयंसेवकहरू, प्रायोजकहरू, र फुड पार्टनर ‘राभिन्तोला परिकार’ लाई विशेष धन्यवाद ज्ञापन गरेको छ।
कार्यक्रमका केही तस्बिरहरू
