.संक्षेपमा.
- आप्रवासी विद्यार्थीहरूलाई थप एक वर्षको लागि अतिरिक्त शिक्षाको अवसर दिइने।
- सरकारले करिब २० मिलियन युरोको थप बजेट विनियोजन गर्ने।
- नयाँ शैक्षिक सहायता प्रणाली अगस्ट २०२६ देखि पूर्ण रूपमा कार्यान्वयनमा आउने।
फिनल्यान्ड सरकारले आप्रवासी पृष्ठभूमि भएका विद्यार्थीहरूको शैक्षिक एकीकरणलाई सहज बनाउन नयाँ कदम चाल्ने भएको छ।
अर्को वर्षदेखि लागू हुने गरी सरकारले प्रारम्भिक वा तयारी शिक्षा (valmistava opetus) बाट नियमित आधारभूत शिक्षामा प्रवेश गर्ने विद्यार्थीहरूलाई सहयोग गर्न करिब २० मिलियन युरोको अतिरिक्त बजेट विनियोजन गर्ने भएको हो।
यो नयाँ व्यवस्था आप्रवासी बालबालिकाहरूका लागि लक्षित छ, जसले फिनल्यान्डको शैक्षिक प्रणालीमा घुलमिल हुन आवश्यक भाषिक सीप र अन्य दक्षताहरू हासिल गर्न मद्दत पुऱ्याउनेछ।
फिनल्यान्डमा आप्रवासी बालबालिकाहरूलाई सामान्यतया एक वर्षको तयारी कक्षामा राखिन्छ। यो कक्षाको मुख्य उद्देश्य उनीहरूलाई फिनिस वा स्विडिस भाषामा निपुण बनाउनु र आधारभूत शिक्षाका लागि तयार पार्नु हो।
नयाँ नियमअनुसार विद्यार्थीहरूले एक वर्षको तयारी कक्षा पूरा गरेपछि आवश्यक परेमा थप एक वर्षसम्म ‘अतिरिक्त शिक्षा’ (lisäopetus) प्राप्त गर्न सक्नेछन्।
विद्यार्थीलाई यस्तो अतिरिक्त शिक्षा आवश्यक छ वा छैन भन्ने कुराको मूल्याङ्कन शिक्षकहरूले गर्नेछन्।
विद्यार्थीलाई यस्तो अतिरिक्त शिक्षा आवश्यक छ वा छैन भन्ने कुराको मूल्याङ्कन शिक्षकहरूले गर्नेछन्।
हाल यो अतिरिक्त शिक्षाको लागि पाठ्यक्रमको आधार तयार गरिँदैछ।
मस्यौदाअनुसार यो थप शिक्षा भाषा-केन्द्रित हुनेछ र नियमित कक्षाकोठामा, सानो समूहमा वा व्यक्तिगत रूपमा प्रदान गरिनेछ।
यो शैक्षिक सुधार अगस्ट २०२६ देखि पूर्ण रूपमा लागू हुनेछ। यसका लागि आवश्यक रकम नगरपालिकाहरूलाई आधारभूत सेवा अनुदान मार्फत वितरण गरिनेछ।
यो व्यवस्थाले फिनल्यान्डमा बसोबास गर्ने नेपाली समुदाय लगायत अन्य आप्रवासी परिवारका बालबालिकाको शैक्षिक भविष्य सुधार्न महत्वपूर्ण भूमिका खेल्ने अपेक्षा गरिएको छ।
