फिनल्यान्डका विश्वविद्यालयमा आजदेखि नयाँ भर्ना सुरु, यस्तो छ आवेदन दिने सजिलो तरिका

फिनल्यान्डमा उच्च शिक्षा अध्ययन गर्न चाहनेहरूका लागि यो वर्षको पहिलो संयुक्त आवेदन अर्थात् Joint Application आजदेखि सुरु भएको छ।

यस अन्तर्गत विशेष गरी अङ्ग्रेजी माध्यममा पढाइने विभिन्न स्नातक र स्नातकोत्तर तहका प्रोग्रामहरूमा आवेदन दिन सकिनेछ।

आवेदन दिने म्याद आजदेखि सुरु भएर आगामी जनवरी २१ मा सकिनेछ। छनोट भएका विद्यार्थीले आगामी सेप्टेम्बरदेखि आफ्नो पढाइ सुरु गर्नेछन्।

आवेदन मार्फत विश्वविद्यालयमा र एप्लाइड साइन्सेस विश्वविद्यालयमा (AMK) दुवैमा भर्ना हुन पाइने छ।

फिनल्यान्डमा संयुक्त आवेदन वर्षमा तीन पटक खुल्ने गर्छ। तर अङ्ग्रेजी माध्यमका धेरैजसो मुख्य कोर्सका लागि वसन्तको यही पहिलो आवेदन नै मुख्य अवसर हो।

फिनिस र स्विडिस भाषाका कोर्समा भर्ना हुन चाहनेका लागि भने दोस्रो आवेदन मार्च महिनामा खुल्नेछ।

केही शैक्षिक संस्थाहरूले भने आफ्नै छुट्टै आवेदन पनि लिने गर्छन्। त्यस्ता आवेदनको समय र सर्तहरू शैक्षिक संस्था अनुसार सामान्यतया: फरक-फरक हुने गर्छन्।

कसरी दिने आवेदन?

यो आवेदन समयमा फिनल्यान्डका ३१ उच्च शिक्षा संस्थाका करिब ३०० डिग्रीमा आवेदन दिन सकिनेछ।

इच्छुक विद्यार्थीले Studyinfo.fi वेबसाइटमा गएर आफैँ आवेदन फारम भर्न सक्नेछन्। यो प्रक्रिया निकै सरल र पारदर्शी भएका कारण इच्छुक विद्यार्थीले बाह्य सहयोग बिना नै आवेदन दिन सक्छन्।

आवेदन दिन सकिने कोर्सहरू यो लिङ्कमा गएर सजिलै सर्च गर्न र हेर्न सकिन्छ।

फिनल्यान्डलाई विश्वकै उत्कृष्ट शिक्षा प्रणाली भएको देश मानिन्छ। पछिल्ला वर्षहरूमा फिनल्यान्ड नेपाली लगायतका धेरै दक्षिणी एसियाली विद्यार्थीको आकर्षक शैक्षिक गन्तव्य रहँदै आएको छ।

यद्यपि फिनल्यान्डको अर्थतन्त्र अहिले लगभग मन्दीकै अवस्थामा रहेको र बेरोजगारी दर पनि उच्च रहेकाले ‘काम गरेर पढ्छु’ भनेर आउने विदेशी विद्यार्थीले फिनल्यान्डमा अनेकौँ समस्या भोग्ने गरेका छन्।

साथै सरकारले समेत आप्रवासन नीतिमा कडाइ गर्दै लगेपछि पिआर लगायतका नियमहरू पनि पहिलेजस्तो सरल छैनन्।

तर आर्थिक स्रोत जुटाएर पढ्नका लागि मात्र आउनेलाई भने फिनल्यान्ड अहिले पनि एक सुरक्षित र भरपर्दो गन्तव्य हो। यहाँका विश्वविद्यालयहरूमा विद्यार्थीलाई दिइने सुविधा र प्रयोगात्मक सिकाइ निकै प्रभावकारी मानिन्छ।