संक्षेपमा
- औसत मूल्य प्रतियुनिट ३८ सेन्टभन्दा माथि पुग्यो।
- बिहान ८ बजेअघि शुल्क प्रतियुनिट ६१ सेन्ट नाघ्यो।
- चिसो र शान्त मौसमका कारण वायु ऊर्जा घट्दा भाउ झनै बढ्यो ।
फिनल्यान्डमा सोमबार बिजुलीको मूल्य यो हिउँदकै उच्च बिन्दुमा पुगेको छ। अत्यधिक चिसो, हावाको कम गति र बढ्दो मागका कारण उपभोक्ताले महँगो शुल्क तिर्नुपर्ने भएको हो।
करसहितको औसत ‘स्पट’ मूल्य सोमबार प्रतियुनिट ३८ सेन्टभन्दा माथि रहेको छ। यो अघिल्ला दिनहरूको तुलनामा निकै धेरै हो।
खासगरि बिहानको समयमा मूल्यमा तीव्र वृद्धि देखिएको छ। बिहान ७:४५ देखि ८:०० बजेसम्म बिजुलीको मूल्य ६१.२३ सेन्ट प्रति किलोवाट घण्टा पुगेको छ।
बिहान ८ बजेदेखि बेलुका ५ बजेसम्म मूल्य ५० सेन्टभन्दा माथि नै रहनेछ।
राति ९ बजेपछि मात्र बिजुलीको मूल्य ४० सेन्टभन्दा तल झर्ने अनुमान छ।
किन बढ्यो बिजुलीको भाउ?
अहिले फिनल्यान्डमा हावा कम चल्दा विन्ड टर्बाइनहरूले पर्याप्त ऊर्जा उत्पादन गर्न सकेका छैनन्।
धैरे चिसोका कारण विन्ड टर्बाइनका ब्लेडहरूमा हिउँ जम्दा उत्पादन अझै घटेको छ। आइतबारको तुलनामा सोमबारको बजार मूल्य कैयौँ गुणा महँगो देखिएको छ।
मौसम विभागका अनुसार फिनल्यान्डभरि चिसो निकै बढेको छ। हेलसिन्की क्षेत्रमा बिहानको तापक्रम माइनस २८ डिग्री सेल्सियससम्म झरेको छ।
जनवरी महिनाको बिजुलीको औसत मूल्य गत वर्षको तुलनामा दोब्बर बढी देखिएको छ।
गत वर्ष जनवरीमा बिजुलीको औसत मूल्य ७ सेन्टभन्दा कम थियो। यो वर्ष बढेर १४.७ सेन्ट पुगेको छ।
फिनल्यान्डमा धेरैजसो घरहरू बिजुलीबाट तताइन्छ।
विज्ञहरूले बिहान ८ देखि १० र बेलुका ४ देखि ८ बजेको व्यस्त समयमा वासिङ मेसिन वा ओभन जस्ता धेरै बिजुली खपत हुने उपकरणहरू प्रयोग नगर्न सल्लाह दिएका छन्।
चिसो समयमा कोठाको तापक्रम १ डिग्री मात्र घटाउँदा पनि बिजुलीको बिलमा ५ प्रतिशतसम्म बचत गर्न सकिन्छ।
