संक्षेपमा
- हेलसिन्कीको माल्मीमा फेब्रुअरी १५ मा शिवरात्रि उत्सव हुने।
- पन्चे बाजा, भजन कीर्तन र शिव ताण्डव नाच कार्यक्रमका मुख्य आकर्षण।
- बिहान १० बजेदेखि शिव रुद्रअभिषेक पूजा पनि सञ्चालन हुने।
फिनल्यान्डमा बसोबास गर्ने नेपाली समुदायका लागि यो वर्षको महाशिवरात्रि पर्व भव्य रूपमा मनाउने अवसर प्राप्त हुने भएको छ।
महाशिवरात्रि पर्वको अवसरमा पशुपतिनाथ समिति फिनल्यान्डले फेब्रुअरी १५ मा हेलसिन्कीको माल्मीमा विशेष सांस्कृतिक तथा धार्मिक कार्यक्रम आयोजना गर्ने भएको हो।
कार्यक्रम माल्मीस्थित Stadin Ammattiopisto/Hyvinvointi को हलमा दिउँसो ३ बजेदेखि बेलुकी ८ बजेसम्म सञ्चालन हुनेछ।
कार्यक्रमको सुरुवात परम्परागत पन्चे बाजाको धुनबाट गरिने आयोजकले बताए।
महाशिवरात्रि हिन्दूहरूको प्रमुख पर्व मध्ये एक हो। यो पर्वलाई भगवान शिव र माता पार्वतीको मिलनको दिनका रूपमा मनाइन्छ। यो वर्ष महाशिवरात्रि फेब्रुअरी १५ का परेको छ।
हुनेछन् विविध कार्यक्रम
हेलसिन्कीमा आयोजना हुने उत्सवलाई थप रोचक बनाउन शिव र पार्वतीको झाँकीका साथै पन्चाङ देवताहरूको प्रस्तुति पनि समावेश गरिएको छ। शिव ताण्डव नाच र बालबालिकाहरूका लागि निबन्ध प्रतियोगिता समेत आयोजना हुनेछ।
कार्यक्रममा सहभागी हुने भक्तजनहरूका लागि अखण्ड भजन कीर्तन र शिव आरतीको व्यवस्था गरिएको छ।
कार्यक्रमको अन्त्यमा उपस्थित सबैलाई शिव प्रसाद वितरण गरिने जानकारी समितिले दिएको छ।
मुख्य समारोहअघि बिहान १० बजेदेखि दिउँसो २ बजेसम्म छुट्टै स्थानमा शिव रुद्रअभिषेक पूजा सम्पन्न गरिनेछ। व्रत बसेर पूजा गर्न चाहनेले समितिलाई पहिले नै सम्पर्क गर्नुपर्ने प्रावधान राखिएको छ।
आयोजकले सपरिवार उपस्थित भई महादेवको कृपा प्राप्त गर्न सबैला निमन्त्रणा रहेको जानकारी दिएका छन्।
पशुपतिनाथ समिति फिनल्यान्डले विगत केही वर्षदेखि फिनल्यान्डमा नेपाली संस्कृति र धार्मिक परम्परालाई जगेर्ना गर्दै आएको छ।
प्रवासमा रहेका नेपालीहरूका लागि आफ्नो मौलिक धर्म र संस्कृति जोगाउन यस्ता कार्यक्रमले महत्वपूर्ण भूमिका खेल्दै आएका छन्।
