संक्षेपमा
- हिउँमाथि पानी जमेकाले पैदलयात्रीका लागि चिप्लिने उच्च जोखिम।
- हेलसिन्की लगायत दक्षिण र मध्य क्षेत्रमा तापक्रम शून्यभन्दा माथि।
- तत्काल अत्यधिक चिसो नबढ्ने मौसमविदको भनाइ।
दक्षिण र मध्य फिनल्यान्डमा शुक्रबार मौसम न्यानो भएसँगै हिँड्ने बाटो निकै चिप्लो भएको छ।
फिनल्यान्डको मौसम पूर्वानुमान महाशाखाले पैदलयात्रीलाई चिप्लिने उच्च जोखिम रहेको भन्दै सजग रहन आग्रह गरेको छ।
बाटोमा जमेको हिउँमाथि पानी जम्मा भएकाले फुटपाथहरू हिँड्नका लागि खतरनाक बनेका छन्। यसैकारण शुक्रबार र शनिबारका लागि चिप्लो बाटोको विशेष चेतावनी जारी गरिएको छ।
हेलसिन्कीमा बिहीबार रातिदेखि नै तापक्रम शून्यको आसपास पुगेको थियो। शुक्रबार पनि तापक्रम शून्यभन्दा माथि (प्लस) नै रहनेछ।
दक्षिण फिनल्यान्डका साथै पोह्योइस-पोह्यानमा र काइनुसम्मको तापक्रम शून्यभन्दा माथि रहनेछ। उत्तरी क्षेत्रमा भने बिहान र दिउँसोको सुरुवाति समयमा केही हिमपात हुन सक्नेछ।
मौसम पूर्वानुमान महाशाखाका अनुसार तत्काल अत्यधिक चिसो बढ्ने कुनै सम्भावना देखिएको छैन। यो न्यानो मौसमपछि सप्ताहन्तमा अर्को न्यून चापीय प्रणाली आउने मौसमविदको प्रक्षेपण छ।
हेलसिन्कीमा बिहीबारदेखि नै हिउँ र पानी मिसिएर पर्न थालेको थियो। शुक्रबार भने १-२ मिलिमिटर मात्र हल्का पानी पर्ने अनुमान गरिएको छ।
फिनल्यान्डमा जाडोयाममा तापक्रम शून्यको तलमाथि भइरहँदा बाटोमा ‘कालो आइस’ बन्ने वा हिउँमाथि पानी जम्ने समस्या धेरै देखिन्छ। यस्तो मौसममा हरेक वर्ष सयौं मानिसहरू चिप्लिएर घाइते हुने र अस्पताल भर्ना हुने गरेका छन्।
विभिन्न अनुसन्धान संस्थाहरूको तथ्याङ्क अनुसार फिनल्यान्डमा हरेक वर्ष जाडो महिनामा मात्रै करिब ५०,००० देखि ७५,००० जना चिप्लिएर लड्ने गर्छन्।
यसरी बाटोमा हिँड्दा हुने दुर्घटनाले गर्दा उपचार खर्च, बिरामी बिदा र काममा हुने अवरोध आदिका कारण फिनल्यान्डको अर्थतन्त्रमा वार्षिक २.४ अर्ब युरोसम्मको घाटा हुने गर्छ।
बाहिर हिँड्दा चिप्लिनबाट बच्न विशेष प्रकारको जुत्ता (Studded shoes) वा जुत्तामा लगाइने Liukueste/Slip guards को प्रयोग गर्नु सुरक्षित मानिन्छ।
