📺 नेपालीलाइनेनका भिडियोहरू अब YouTube मा हेर्नुहोस्।
▶️ Let's Goसंक्षेपमा
- मुख्य रेलवे स्टेसन र आतेनेउम अगाडि निजी कारलाई पूर्ण रूपमा रोक।
- ट्राम बिसौनी विस्तार र नयाँ हरियाली विश्रामस्थल निर्माणको योजना।
- सन् २०२८ बाट सुरु भई दुई चरणमा निर्माण कार्य सम्पन्न हुने।
हेलसिन्की नगरपालिकाले सहरको केन्द्र मानिने ‘सिटी सेन्टर’को स्वरुपमा व्यापक परिवर्तन गर्ने भएको छ।
नयाँ योजना अनुसार सहरको मुटु मानिने Kaivokatu नयाँ ‘मुख्य प्रवेशद्वार’ बन्नेछ भने रेलवे स्टेसन अगाडिको सडकबाट निजी गाडी गुड्न पूर्ण रूपमा प्रतिबन्ध लगाइने छ।
सहरको वातावरण समितिले आगामी मंगलबार (मार्च १७) काइभोकातुको सहरी योजनाबारे छलफल गर्दै छ। भविष्यमा उक्त सडकलाई पैदलयात्री, साइकलयात्री र सार्वजनिक यातायातका लागि मात्र खुला गर्ने योजना छ।
नयाँ योजना अनुसार रेलवे स्टेसन अगाडिको भाग पूर्ण रूपमा पैदलयात्रीको प्रयोगमा आउनेछ। त्यहाँ रहेका कार पार्किङहरू हटाइनेछ भने साइकल लेनलाई काइभोकातुको अर्कोतर्फ सारिनेछ।
साँघुरा फुटपाथलाई फराकिलो चोक जस्तो बनाइनेछ। उक्त क्षेत्रमा रूखबिरुवा रोपेर बस्ने ठाउँ र टेरेसहरू निर्माण गर्ने योजना छ।
सार्वजनिक यातायातको सहजताका लागि रेलवे स्टेसन अगाडि चारवटा ट्राम बिसौनी बनाइनेछ। हाल त्यहाँ दुईवटा मात्र ट्राम बिसौनी छन्।
Mikonkatu र Sokos बीचको सडक खण्डबाट पनि कारहरूलाई पूर्ण रूपमा हटाइनेछ। पैदलयात्रीका लागि रेलवे स्टेसन र Ateneum अगाडि ट्राफिक बत्तीसहितको जेब्राक्रस राखिनेछ।
यो निर्माण कार्य सन् २०२८ बाट दुई चरणमा सुरु हुनेछ, र पुरै काम पुरा हुन केही वर्ष लाग्नेछ।
हेलसिन्कीले आफ्नो केन्द्रलाई थप आकर्षक, सुरक्षित र वातावरणमैत्री बनाउन दिगो यातायात प्रणालीलाई लामो समयदेखि प्राथमिकता दिँदै आएको छ।
काइभोकातु र मुख्य रेलवे स्टेसन वरपरको क्षेत्र फिनल्यान्डकै सबैभन्दा व्यस्त मध्येको एक हो, जहाँ दैनिक हजारौं मानिस आवतजावत गर्छन्।
सहरी केन्द्रलाई कारमुक्त बनाउने यो कदम हेलसिन्कीको फराकिलो रणनीतिको एउटा हिस्सा हो। युरोपका अन्य प्रमुख सहरहरूले पनि हालका वर्षहरूमा सहरको मध्यभागलाई कारमुक्त बनाउने यस्तै सफल अभ्यासहरू गरिसकेका छन्।
नेपालीलाइनेनबाट थप:
निर्मल पुर्जाको मृत्युपछि पूर्व मिस फिनल्यान्डलाई 'हेट मेसेज'को वर्षा, ज्यान मार्ने धम्की
एसडिपीको नयाँ 'आप्रवासी नीति'ले फिनिस राजनीति तरङ्गितः के छ आप्रवासी नेताको मत?
हेलसिन्की-तालिन सुरुङ रेलमार्गको चर्चा फेरी सुरू, निर्माण सम्पन्न भए हुनेछ 'गेम चेन्जर'
समुद्रमा तैरिने सहर: यस्ता छन् फिनल्यान्डमा बनेका संसारकै सबैभन्दा ठुला पानीजहाज
प्रिय पाठक, हाम्रो 'सहयोगी सदस्य' बनी हाम्रो कामलाई सघाउनुहोस्। साथै हाम्रा सबै प्रिमियम सामाग्री पढ्नुहोस्।
