संक्षेपमा
- १४२ जनाको डाटा अनुमति बिना हेरेको पुष्टि।
- कर्मचारीलाई आठ महिनाको निलम्बित जेल सजाय।
- पीडितहरूलाई क्षतिपूर्ति तिर्न अदालतको आदेश।
हेलसिन्की जिल्ला अदालतले व्यक्तिगत डाटा सुरक्षा कानुन उल्लंघन गरेको भन्दै HUS अस्पतालमा काम गर्ने एक कर्मचारीलाई आठ महिनाको निलम्बित जेल सजाय सुनाएको छ।
HUS फिनल्यान्डको उसीमा क्षेत्रमा विशेष स्वास्थ्य सेवा प्रदान गर्ने सबैभन्दा ठूलो र प्रमुख संस्था हो। HUS अस्पतालहरूमा धेरै नेपालीहरुले समेत काम गर्ने गर्छन्।
ती कर्मचारीले सन् २०१९ देखि २०२३ को बीचमा १४२ जनाको व्यक्तिगत विवरण अनुमति बिना हेरेको अदालतले उल्लेख गरेको छ।
अदालतको फैसला अनुसार ती कर्मचारीले जनसंख्या दर्ता प्रणालीबाट मानिसहरूको नाम, ठेगाना र पारिवारिक सम्बन्धको जानकारी हेरेको पुष्टि भएको हो।
यसका साथै उनले ११ जनाको बिरामी रेकर्ड प्रणालीमा समेत अनधिकृत पहुँच बनाएको फैसलामा उल्लेख छ।
तीमध्ये ९ जना बिरामीले कुन HUS एकाइमा उपचार गराएका थिए भन्ने जानकारी समेत दोषी कर्मचारीले लिएको देखिएको छ। यद्यपि अदालतले उनी विस्तृत बिरामी रिपोर्टसम्म भने पुग्न नसकेको बताएको छ।
क्षतिपूर्ति माग गर्ने पीडितहरूलाई ती कर्मचारीले आर्थिक क्षतिपूर्ति तिर्नुपर्ने फैसलामा उल्लेख छ। सन् २०२३ को वसन्तमा यस घटनाको आशंका हुनासाथ HUS ले उनलाई कामबाट निकालेको थियो।
उनी HUS को बिलिङ विभागमा काम गर्ने कर्मचारी रहेको बताइएको छ। यो अदालतको फैसला भने अहिलेसम्म कानुनी रूपमा अन्तिम भने हैन।
फिनल्यान्डमा बिरामीको व्यक्तिगत डाटा सुरक्षालाई अत्यन्तै गम्भीर रूपमा लिइन्छ र स्वास्थ्यकर्मीहरूले आफ्नो कामको सिलसिलामा बाहेक अरूको विवरण हेर्न कानुनतः सख्त मनाही छ।
सन् २०२३ मा पनि HUS मा बिरामीको डाटा अनधिकृत रूपमा हेरिएका धेरै घटनाहरू सार्वजनिक भएका थिए। एक वर्षअघि मात्रै HUS मा काम गर्ने एक प्राक्टिकल नर्स (lähihoitaja) लाई पनि यसैगरी बिरामीको विवरण विना अनुमति हेरेको आरोपमा अदालतले सजाय सुनाएको थियो।
