संक्षेपमा
- गन्तव्यभन्दा २०० मिटर अगाडि स्वास्थ्य समस्या।
- घटनास्थलमै मृत्यु भएको प्रहरीको पुष्टि।
- मृत्युको कारणबारे प्रहरीद्वारा अनुसन्धान सुरु।
हेलसिन्की हाफ म्याराथनमा सहभागी एक युवा धावकको शनिबार बिहान मृत्यु भएको छ। दौड पूरा गर्न करिब २०० मिटर बाँकी रहँदा उनलाई अचानक स्वास्थ्य समस्या देखिएको थियो।
घटना हेलसिन्कीको मेरिपुइस्तो नजिकै बिहान करिब १० बजे भएको हो। हेलसिन्की प्रहरीले ती व्यक्तिको घटनास्थलमै मृत्यु भएको पुष्टि गरेको छ।
प्रहरीले अहिले मृत्युको वास्तविक कारणबारे अनुसन्धान गरिरहेको छ।
कार्यक्रमका प्रबन्धक तापानी भिर्तानेनले घटनास्थलमा ती युवालाई कृत्रिम श्वासप्रश्वास (CPR) दिएर बचाउने प्रयास गरिए पनि बचाउन नसकिएको स्थानीय मिडियालाई बताएका छन्।
घटनापछि कार्यक्रमको प्राथमिक उपचार टोलीले तुरुन्तै सहयोग गरेको थियो। उद्धार टोली पनि केही मिनेटमै त्यहाँ पुगेको थियो।
भिर्तानेनका अनुसार त्यहाँ दुईवटा एम्बुलेन्स र एउटा उद्धार एकाइ पुगेका थिए। आपत्कालीन उद्दार करिब आधा घण्टासम्म चलेको थियो।
एक प्रत्यक्षदर्शीले हेलसिन्की सानोमात पत्रिकालाई बताए अनुसार ती पुरुषलाई छातीमा कडा दबाब दिएर बचाउने प्रयास गरिएको थियो। एम्बुलेन्स पुगेपछि उक्त क्षेत्र सर्वसाधारणका लागि बन्द गरिएको थियो।
हेलसिन्की हाफ म्याराथन फिनल्यान्डको राजधानी हेलसिन्कीमा आयोजना हुने एक लोकप्रिय वार्षिक दौड प्रतियोगिता हो। यसमा हरेक वर्ष हजारौं स्वदेशी तथा विदेशी धावकहरू सहभागी हुन्छन्।
म्याराथन र लामो दूरीका दौडहरूमा सहभागी हुँदा कहिलेकाहीं चरम शारीरिक थकानका कारण अचानक हृदयघात वा अन्य गम्भीर स्वास्थ्य समस्याहरू देखिने जोखिम रहन्छ, जसका कारण आयोजकहरूले मार्गभरि स्वास्थ्यकर्मी र एम्बुलेन्सको व्यवस्था गरेका हुन्छन्।
