फिनल्यान्डमा हराएका भारतीय विद्यार्थीको खोजी तीव्रः यस्तो थियो बेपत्ता हुनुअघिको घटनाक्रम

(प्रिय पाठक, यो नेपालीलाइनेनका सहयोगी सदस्यहरूले मात्र पढ्न मिल्ने ‘प्रिमियम स्टोरी’ हो। ‘सहयोगी सदस्य’ बनी हामीलाई सघाउनु भएकोमा धेरै-धेरै धन्यवाद।)

अपराध दर निकै कम रहेको फिनल्यान्डमा सामान्यतया विदेशी विद्यार्थीहरूका लागि विश्वकै सुरक्षित गन्तव्यमध्ये एक मानिन्छ। तर विगत सात हप्तादेखि एक १८ वर्षीय भारतीय विद्यार्थीको रहस्यमय बेपत्ता प्रकरणले यो शान्त नर्डिक राष्ट्रको सुरक्षा व्यवस्था र प्रहरी अनुसन्धानमाथि गम्भीर प्रश्न खडा गरेको छ।

विज्ञापन

 

 

 

थप पढ्नुहोस्

विज्ञापन सकियो

“मैले उसलाई फिनल्यान्ड सुरक्षित ठाउँ हो भनेरै पठाएको थिएँ। फिनल्यान्डमा यस्तो घटना हुनु नपर्ने हो।” अमेरिकाको न्युयोर्कमा बस्ने मनिदीपका मामा किरियान रेड्डीले मिडियालाई दिएको प्रतिक्रियामा भनेका छन्।

भारतको तेलङ्गाना राज्यस्थित रंगारेड्डी जिल्लाको हयातनगरका मनिदीप रेड्डी गुज्जा अगस्ट २०२५ मा इन्जिनियरिङ अध्ययन गर्न फिनल्यान्ड आएका थिए। उनी LUT विश्वविद्यालयको लाहती क्याम्पसमा भर्ना भएका थिए र त्यहीँको विद्यार्थी आवासमा बस्दै आएका थिए।

भर्खरै मार्च महिनामा १८ वर्ष पूरा गरेका मनिदीप शान्त स्वभावका थिए। भारतीय पत्रिकाहरुले परिवारलाई उधृत गर्दै लेखे अनुसार उनी आफ्नो कोठामा बसेर एनिमे/कार्टुन चलचित्र हेर्न रुचाउँथे र समरका लागि पार्ट टाइम काम खोजिरहेका थिए।

परिवारका अनुसार उनको व्यवहारमा कुनै अस्वाभाविकता थिएन। उनी आफ्ना आमाबाबुसँग नियमित सम्पर्कमा रहन्थे र कुनै पनि व्यक्तिगत, शैक्षिक वा आर्थिक समस्या भएको कुरा कहिल्यै उल्लेख गरेका थिएनन्।

बेपत्ता हुनुअघिको घटनाक्रम

मे ४ का दिन दिउँसो मनिदीपले आफ्नी आमालाई टेक्स्ट मेसेज पठाउँदै साथीहरूसँग खाना खानका लागि आमाको बैंक खातासँग जोडिएको क्रेडिट कार्ड प्रयोग गर्न अनुमति मागेका थिए।

आमाले कार्ड प्रयोग गर्न अनुमति दिएपछि उनले धन्यवाद दिँदै सोही दिन बेलुका फोन गर्ने वाचा गरेका थिए, तर त्यो कल कहिल्यै आएन।

भोलिपल्ट मे ५ मा फोन गर्दा मनिदीपले फोन उठाएनन्। अमेरिकामा बस्ने मामा किरियान रेड्डीले क्रेडिट कार्डको कारोबार हेरे र ‘Find My iPhone’ को लोकेसन डाटा पनि ट्र्याक गरियो। त्यसो गर्दा उनको यात्रा विवरण यस्तो देखियो:

• लाहतीमा स्थानीय बसको टिकट खरिद
• लाहतीको रेल स्टेसनबाट रेलको टिकट खरिद
• लाहतीबाट हेलसिन्कीको यात्रा
• हेलसिन्कीको एक बर्गर पसलमा किनमेल
• राति करिब ८ बजे हेलसिन्कीकै एक किराना पसलमा किनमेल (प्रहरीसँग यसको सिसिटिभी फुटेज छ, तर पसलको नाम र स्थान खुलाइएको छैन)
• राति करिब ११ बजे ‘Find My iPhone‘ ले देखाएको अन्तिम लोकेसन: हेलसिन्कीको Kruunuvuorenranta स्थित Saaristolaivastonkatu को अन्तिम विन्दु।

त्यसपछि उनको मोबाइल बन्द भयो।

हेलसिन्कीको क्रुनुभुओरेन रान्तामा त्यो रात मनिदीपसँग के भयो? के उनी कसैलाई भेट्न त्यहाँ पुगेका थिए वा कुनै दुर्घटनामा परे? यो सबै रहस्यको गर्भमै छ।

हराएको करिब चार दिनपछि मे ८ मा मामा किरियानले फिनल्यान्डको प्रहरीलाई सम्पर्क गरे। प्रहरीले मनिदीपको कोठामा गएर हेर्दा उनको कम्प्युटर चार्जमै रहेको र भाँडाहरू नमाझेको अवस्थामा भेटिएको थियो।

सुरुमा प्रहरीले “सायद साथीहरूसँग कतै गएको होला, चिन्ता लिनु पर्दैन” भन्दै आश्वस्त पार्न खोजेको थियो।

अन्ततः मे ११ मा हामे प्रहरी कार्यालयमा औपचारिक रूपमा बेपत्ता भएको उजुरी दर्ता भयो। तर परिवारका अनुसार आज ५० दिनभन्दा बढी समय बितिसक्दा पनि प्रहरीको तर्फबाट एउटै मात्र जवाफ आइरहेको छ: “अहिलेसम्म कुनै नयाँ जानकारी छैन।”

भाषा र भूगोल दुवैको ज्ञान नभएका मनिदीप कसरी यतिका दिनसम्म बेपत्ता हुन सक्छन् भन्ने चिन्ताले परिवारलाई पिरोलेको छ।

बाबुआमालाई फिनल्यान्डले दिएन भिसाः भारतमा राजनीतिक र कानुनी दबाब

मनिदीपका बाबुआमा आफै आएर छोराको खोजीलाई द्रुत बनाउन चाहान्थे। तर फिनल्यान्डले भिसा दिन अस्वीकार गरेपछि उक्त परिवार निकै दुखी भएको छ।

भारतस्थित फिनल्यान्डको दूतावासले नियम र आवश्यकता अनुसार नै यो निर्णय लिइएको बताएको छ।

भिसा अस्वीकार गर्नुको मुख्य कारण उनीहरूसँग पर्याप्त रकम नभएको र भिसाको अवधि सकिएपछि भारत फर्किने ग्यारेन्टी नदेखिएको भन्ने छ—जुन सामान्यतया भिसा अस्वीकार गर्दा देखाइने आम कारण हुन्।

तर, उक्त परिवारले भने आफूहरूसँग पर्याप्त रकम रहेको दाबी गर्दै दूतावासको यो आरोपलाई निराधार बताएको छ।

फिनल्यान्डको परराष्ट्र मन्त्रालयको नियमअनुसार यहाँ घुम्न आउने पर्यटकले प्रतिदिन करिब ५० युरो बराबरको रकम आफूसँग रहेको देखाउनु पर्छ, जुन रकम आफ्नो परिवारसँग उपलब्ध रहेको उनीहरूको भनाइ छ।

फिनल्यान्डको यस्तो व्यवहारबाट सो परिवार निकै दुखी भएको भारतीय सञ्चारमाध्यमहरूले पनि उल्लेख गरेका छन्।

फिनल्यान्ड प्रहरीको अनुसन्धानबाट ठोस नतिजा नआएपछि र भिसा पनि नपाएपछि मनिदीपको परिवारले भारतमै कूटनीतिक र कानुनी लडाइँ सुरु गरेको छ।

जुन २१ मा तेलङ्गानाका प्रमुख राजनीतिज्ञ के.टी. रामा रावले मनिदीपका मातापितालाई भेटी भारतको विदेश मन्त्रालय र फिनल्यान्डस्थित भारतीय दूतावासलाई तत्काल कदम चाल्न आग्रह गरेका छन्।

यसैबीच मनिदीपका मातापिताले तेलङ्गाना उच्च अदालतमा रिट पनि दायर गरेका छन्। न्यायाधीश बी. विजयसेन रेड्डीले भारतको केन्द्र सरकारलाई यो विषयमा के कस्ता कदम चालिएका छन् भनी जवाफ पेस गर्न निर्देशन दिएका छन्।

समुन्द्रमा खोजी शुरु

कतै नभेटिएपछि मनीदिपको अन्तिम लोकेशन हेलसिन्कीको क्रुनुभुओरेन रान्ता क्षेत्रमा पानीमा खोजी गर्ने एउटा स्वयंसेवक टोलीले उनको खोजी सुरु गरेको छ।

खोजी कार्यमा संलग्न आन्ने यार्भिनेनका अनुसार स्वयंसेवक टोलीका तालिमप्राप्त कुकुरहरूले उक्त क्षेत्रमा केही संकेतहरू फेला पारेका छन्।

“हामीले प्रहरीलाई यसबारे जानकारी गराइसकेका छौं र केही फेला परेमा तुरुन्तै अधिकारीहरूलाई खबर गर्नेछौं,” उनले इल्ता सानोमातलाई दिएको प्रतिक्रियामा बताएकी छन्। “अहिले हामीसँग ठ्याक्कै कहाँ हराएको भन्ने जानकारी भएकाले खोजी गरिरहेका छौं।”

शुक्रबारको खोजी कार्य क्रुनुभुओरेन रान्ताको तटीय क्षेत्रमा केन्द्रित थियो। तर, हावाहुरी बढेका कारण करिब डेढ घण्टापछि खोजी कार्य रोक्नुपरेको थियो। यद्यपि, आउँदा केही दिनसम्म खोजी कार्य जारी रहनेछ।