📺 नेपालीलाइनेनका भिडियोहरू अब YouTube मा हेर्नुहोस्।
▶️ Let's Goसंक्षेपमा
- सन् २०२७ देखि टिकटमै ‘क्यारी-अन’ र सानो झोला समावेश गर्नुपर्ने नियम पारित।
- बालबालिकासँगै बस्न र टिकटको नाम सच्याउँदा लाग्ने अतिरिक्त शुल्क खारेज।
- उडान रद्द वा ढिलाइ भएमा यात्रुले ६०० युरोसम्म क्षतिपूर्ति पाउने सुनिश्चित।
युरोपेली युनियन (ईयू) ले हवाई यात्रुको अधिकारलाई बलियो बनाउँदै सन् २०२७ देखि विमानको टिकटमै ‘ह्यान्ड ब्याग’ को शुल्क अनिवार्य समावेश गर्नुपर्ने नयाँ नियम ल्याएको छ। यससँगै राइनएयर (Ryanair) र इजीजेट (EasyJet) जस्ता बजेट एयरलाइन्सले झोलाका नाममा लिने लुकेको अतिरिक्त शुल्कको अन्त्य हुनेछ।
नयाँ नियमअनुसार यात्रुले ४०x३०x१५ सेन्टिमिटरको एउटा व्यक्तिगत झोला र ७ किलोग्रामसम्मको अर्को ‘क्यारी-अन’ झोला (अधिकतम १०० सेन्टिमिटर) बिना अतिरिक्त शुल्क लैजान पाउनेछन्। यद्यपि, ठूलो ‘क्यारी-अन’ झोला नबोक्ने यात्रुले भने टिकटमा थप छुट पाउने विकल्प एयरलाइन्सले खुला राख्नुपर्नेछ।
यसका साथै बालबालिकासँगै बस्नका लागि यात्रुले अब थप रकम तिर्नुपर्ने छैन। टिकटमा भएको नामको हिज्जे/अक्षर सच्याउन र ‘बोर्डिङ पास’ का लागि अनिवार्य मोबाइल एप डाउनलोड गर्नुपर्ने बाध्यता पनि एयरलाइन्सले लाद्न पाउने छैनन्।
उडान ढिलाइमा पाउने क्षतिपूर्तिको नियमलाई पनि थप स्पष्ट पारिएको छ। ३५०० किलोमिटरभन्दा लामो उडानमा ढिलाइ भए ३०० युरो र ४ घण्टाभन्दा बढी ढिला वा रद्द नै भएमा ६०० युरोसम्म क्षतिपूर्ति एयरलाइन्सले तिर्नुपर्नेछ। साथै, फिर्ता उडानमा ‘नो-सो’ (no-show) बापत लाग्ने जरिवाना पनि बन्द गरिनेछ।
एयरलाइन्स कम्पनीहरूले भने यस्ता नियमले बजारमा प्रतिस्पर्धा घटाउने र टिकटको मूल्य नै महँगो हुने चेतावनी दिएका छन्। तर १३ वर्ष लामो राजनीतिक वार्तापछि आएको यो नियमले हवाई यात्राको मूल्यलाई पारदर्शी बनाउने भन्दै उपभोक्ताले भने स्वागत गरेका छन्।
फिनल्यान्डको हेलसिन्की लगायत युरोपका अन्य सहरबाट सस्तो टिकटमा युरोपकै अन्य गन्तव्य वा नेपाल यात्रा गर्ने नेपाली आप्रवासीका लागि यो नियम निकै लाभदायक हुनेछ।
सस्तो एयरलाइन्सले सुरुमा कम मूल्य देखाएर पछि झोला, सिट र ‘बोर्डिङ पास’ का नाममा चर्को शुल्क असुल्ने प्रवृत्ति हटेपछि यात्रुहरूले यात्राको वास्तविक खर्च बेलैमा थाहा पाउनेछन्।
नेपालीलाइनेनबाट थप:
निर्मल पुर्जाको मृत्युपछि पूर्व मिस फिनल्यान्डलाई 'हेट मेसेज'को वर्षा, ज्यान मार्ने धम्की
एसडिपीको नयाँ 'आप्रवासी नीति'ले फिनिस राजनीति तरङ्गितः के छ आप्रवासी नेताको मत?
हेलसिन्की-तालिन सुरुङ रेलमार्गको चर्चा फेरी सुरू, निर्माण सम्पन्न भए हुनेछ 'गेम चेन्जर'
समुद्रमा तैरिने सहर: यस्ता छन् फिनल्यान्डमा बनेका संसारकै सबैभन्दा ठुला पानीजहाज
प्रिय पाठक, हाम्रो 'सहयोगी सदस्य' बनी हाम्रो कामलाई सघाउनुहोस्। साथै हाम्रा सबै प्रिमियम सामाग्री पढ्नुहोस्।
