📺 नेपालीलाइनेनका भिडियोहरू अब YouTube मा हेर्नुहोस्।
▶️ Let's Goसंक्षेपमा
- आगामी नोभेम्बर १४ मा बैंककमा पहिलो ‘युरोभिजन एसिया’ आयोजना हुने।
- नेपालसहित एसियाका १० देशको सहभागिता रहने।
- प्रतियोगिताको नियम युरोपेली युरोभिजनकै जस्तो हुने।
एसियाली देशहरूका लागि पहिलो पटक युरोभिजन सङ कन्टेस्ट एसिया (Eurovision Song Contest Asia) आयोजना हुने भएको छ। आगामी नोभेम्बर १४ मा थाइल्यान्डको राजधानी बैंककमा हुने उक्त प्रतियोगितामा नेपालले पनि भाग लिनेछ।
प्रतियोगितामा नेपालसहित १० देशले प्रतिस्पर्धा गर्दैछन्। अन्य सहभागी देशहरूमा बंगलादेश, भुटान, कम्बोडिया, लाओस, मलेसिया, फिलिपिन्स, दक्षिण कोरिया, थाइल्यान्ड र भियतनाम रहेका छन्।
हरेक देशले फाइनल अघिका महिनाहरूमा आफ्नो प्रतिनिधि छान्नेछन्। यसको नियम युरोपमा हुने युरोभिजनको जस्तै हुनेछ।
प्रतियोगिताको नाम ‘एसियाभिजन’ नभई ‘युरोभिसन एसिया’ नै राखिएको छ। धेरैले नाम फेर्नुपर्ने बताए पनि अहिले त्यस्तो कुनै योजना छैन।
युरोभिजनका निर्देशक मार्टिन ग्रीनले ‘द गार्डियन’ पत्रिकासँग कुरा गर्दै यो एसियासँगको सहकार्य भएको बताए। उनले यसले एसियाली आवाज र पहिचानलाई झल्काउने दाबी गरे।
नेपालमा हिमालय टेलिभिजनले आधिकारिक प्रसारण साझेदारको जिम्मेवारी पाएको छ । सोही टेलिभिजनले नेपालको प्रतिनिधि छनोटका लागि राष्ट्रिय अडिसन आयोजना गर्नेछ र कार्यक्रम प्रसारण पनि गर्नेछ।
हिमालय टिभीका कार्यकारी निर्देशक श्याम कँडेलले नेपाली मिडियालाई बताए अनुसार अर्को सातादेखि नेपाल अडिसन सुरु हुनेछ र १९ सेप्टेम्बरमा नेपालको विजेता छनोट हुनेछन् । विजेताले घोषित फिनालेमा बैंकक पुगेर ब्यान्डसहित प्रस्तुति दिनेछन् ।
यस्तो छ युरोभिजनको पृष्ठभूमि
७ दशकभन्दा लामो इतिहास बोकेको युरोभिजनले हरेक वर्ष करोडौं दर्शकलाई आकर्षित गर्दै आएको छ ।
युरोभिजनलाई यसअघि पनि विस्तार गर्ने प्रयास भएको थियो। सन् २०२२ मा अमेरिकामा ‘अमेरिकन सङ कन्टेस्ट’ आयोजना गरिए पनि त्यसले दर्शकको खासै ध्यान तान्न सकेन।
सन् २००८ मै युरोभिजनको एसियाली संस्करण ल्याउने प्रयास भएको थियो जसमा चीन, जापान र ताइवान सहभागी हुने कुरा थियो, तर त्यो योजना सफल हुन सकेन।
फिनल्यान्डमा बस्ने नेपालीहरूका लागि युरोभिजन निकै परिचित नाम हो, अब आफ्नै देश नेपाल सहभागी हुने भएपछि यसले सायद डायस्पोरामा थप उत्साह जगाउनेछ।
नेपालीलाइनेनबाट थप:
निर्मल पुर्जाको मृत्युपछि पूर्व मिस फिनल्यान्डलाई 'हेट मेसेज'को वर्षा, ज्यान मार्ने धम्की
एसडिपीको नयाँ 'आप्रवासी नीति'ले फिनिस राजनीति तरङ्गितः के छ आप्रवासी नेताको मत?
हेलसिन्की-तालिन सुरुङ रेलमार्गको चर्चा फेरी सुरू, निर्माण सम्पन्न भए हुनेछ 'गेम चेन्जर'
समुद्रमा तैरिने सहर: यस्ता छन् फिनल्यान्डमा बनेका संसारकै सबैभन्दा ठुला पानीजहाज
प्रिय पाठक, हाम्रो 'सहयोगी सदस्य' बनी हाम्रो कामलाई सघाउनुहोस्। साथै हाम्रा सबै प्रिमियम सामाग्री पढ्नुहोस्।
