फिनल्यान्ड बन्यो लगातार नवौँ पटक विश्वकै सबैभन्दा खुसी देश

फिनल्यान्ड पुनः एकपटक विश्वको सबैभन्दा खुसी देश घोषित भएको छ। फिनल्यान्डले विश्व खुसी प्रतिवेदन (वर्ल्ड ह्यापिनेस रिपोर्ट) को शीर्ष स्थान ओगटेको यो लगातार नवौँ पटक हो।

यो वर्गीकरण पूर्ण रूपमा मानिसहरूले आफ्नो जीवनको गुणस्तरलाई कसरी हेर्छन् भन्ने आधारमा तय गरिएको हो। फिनल्यान्डका बासिन्दाले आफ्नो जीवनलाई १० मध्ये औसत ७.८ अंक दिएका छन्।

फिनल्यान्ड पछि आइसल्यान्ड र डेनमार्क दोस्रो र तेस्रो छन्।

नेपाल ९९ औँ नम्बरमा छ भने भारत ११६ औँ स्थानमा छ। दक्षिण एसियाका अन्य मुलुकहरू धेरै पछाडी छन्।

यो वर्षको प्रतिवेदनमा कोस्टा रिका सबैभन्दा ठूलो आश्चर्य बनेको छ। सन् २०२३ मा २३ औँ स्थानमा रहेको यो देशले ठूलो सुधार गर्दै यसपटक शीर्ष १० भित्र स्थान बनाउन सफल भएको छ।

पहिले शीर्ष स्थानमा रहने गरेको स्विट्जरल्यान्ड एक वर्षको अन्तरालपछि पुनः उत्कृष्ट १० मा फर्किएको छ। गत वर्ष जस्तै यस वर्ष पनि शीर्ष १० भित्र कुनै पनि अंग्रेजी भाषी देश पर्न सकेनन्।

विश्वका द्वन्द्वग्रस्त क्षेत्र वा त्यसको नजिक रहेका देशहरू भने सूचीको सबैभन्दा अन्तिममा रहेका छन्। प्रतिवेदनका अनुसार सुरक्षा र शान्तिले खुसीमा प्रत्यक्ष असर पार्ने देखिन्छ।

विज्ञहरूका अनुसार प्रति व्यक्ति कुल गार्हस्थ्य उत्पादन (जीडीपी) र औसत आयुले देशहरूबीचको भिन्नता देखाउँछन्। यसका साथै व्यक्तिगत स्वतन्त्रता र कम भ्रष्टाचारलाई पनि खुसीको मुख्य आधार मानिएको छ।

प्रतिवेदनले फिनल्यान्डका मानिसहरूमा रहेको “एकअर्काप्रतिको भरोसा” लाई पनि महत्त्वपूर्ण मानेको छ। कसैलाई अप्ठ्यारो पर्दा विश्वास गर्न सक्ने मान्छे छ भन्ने भावनाले खुसी बढाउन मद्दत गर्छ।

यो सूची कुनै बाह्य मूल्याङ्कनकर्ताले नभई सम्बन्धित देशका नागरिकले आफैँलाई दिएको अंकको आधारमा तयार पारिएको हो। यसले गर्दा यो तथ्याङ्कलाई मानिसहरूको वास्तविक भोगाइको रूपमा हेरिन्छ।

विश्व खुसी प्रतिवेदन प्रत्येक वर्ष मार्च महिनामा सार्वजनिक गरिन्छ।

फिनल्यान्डमा सामाजिक सुरक्षा, गुणस्तरीय शिक्षा र स्वास्थ्य सेवा सबैका लागि समान रूपमा उपलब्ध हुनु नै यहाँको खुसीको मुख्य “पूर्वाधार” मानिन्छ।

फिनल्यान्डमा बसोबास गर्ने नेपाली आप्रवासीहरूका लागि पनि यहाँको स्थिर प्रणाली र सुरक्षित वातावरणले जीवन सहज बनाउन ठूलो भूमिका खेलेको छ।