📺 नेपालीलाइनेनका भिडियोहरू अब YouTube मा हेर्नुहोस्।
▶️ Let's Go.संक्षेपमा.
- भान्तामा नयाँ गैर-नाफामुखी नेपाली संस्थाको स्थापना।
- सांस्कृतिक कार्यक्रम र सामुदायिक सहयोग संस्थाको मुख्य उद्देश्य।
- पहिलो तीज कार्यक्रम सम्पन्न।
फिनल्यान्डको भान्ता शहर र यस वरपर बसोबास गर्दै आएका नेपालीहरूलाई सङ्गठित गर्दै समुदायको हितमा काम गर्ने उद्देश्यका साथ “भान्ता नेपाली सङ्घ” (Vantaa Nepalese Association, Vantaan Nepalilainen Yhdistys ry) को सुरुवात गरिएको छ।
यो संस्था गैर-नाफामुखी संस्थाको रूपमा दर्ता भएको हो। संस्थाले नेपाली कला, संस्कृति तथा समुदायको प्रवर्द्धनमा जोड दिने जनाइएको छ।
संस्थाको नेतृत्व अध्यक्षको रूपमा अन्जु ओलीले गरेकी छिन्। सदस्यहरूमा केशव ओली, सोनु वाग्ले ओली, रोलेक्स वाग्ले र आरुषी ढकाल रहेका छन्।
सांस्कृतिक तथा कलात्मक कार्यक्रमहरू आयोजना गर्ने, खेलकुद गतिविधिहरूलाई प्रोत्साहन गर्ने र नेपाली चाडपर्वहरूलाई भव्यताका साथ मनाउने मुख्य उद्देश्यका साथ संस्थाको स्थापना गरिएको संस्थाका सदस्य केशव ओलीले नेपालीलाइनेनलाई बताए।
भान्ता क्षेत्रमा नयाँ आएका नेपालीहरूलाई समाजमा घुलमिल हुन र आवश्यक सहयोग प्रदान गर्न पनि सङ्घले विशेष पहल गर्ने ओलीले बताए।
संस्थाको स्थापना “फिनल्यान्डमा नेपाली” नामक फेसबुक समूहको पहलमा भएको पनि ओलीले जानकारी दिए। उक्त समूहले गरेको एक सर्वेक्षणमा नेपाली समुदायबाट प्राप्त सुझाव र गुनासाहरूलाई सम्बोधन गर्न यो संस्थाको आवश्यकता महसुस गरिएको थियो। उक्त फेसबुक समूहमा करिब पच्चिस हजार सदस्य छन्।
मनायो तीज
स्थापनाको केही दिनमै सङ्घले आफ्नो पहिलो सार्वजनिक कार्यक्रमको रूपमा हिजो अगस्ट २३ का दिन निःशुल्क तीज विशेष कार्यक्रम सम्पन्न गरेको छ। पहिलो भए पनि उक्त कार्यक्रम निकै सफल भएको र यसले भान्ता तथा वरपरका नेपाली समुदायलाई तीजको अवसरमा पहिलो पटक एउटै मञ्चमा भेला गराएको आयोजकले जनाएको छ।
समुदायमा एकता, सक्रियता र सहयोगको भावना अभिवृद्धि गर्ने लक्ष्य लिएको यस संस्थाले आगामी दिनहरूमा थप विविध सामाजिक, सांस्कृतिक तथा सामुदायिक कार्यक्रमहरू ल्याउने योजना बनाएको जनाएको छ।
नेपालीलाइनेनबाट थप:
निर्मल पुर्जाको मृत्युपछि पूर्व मिस फिनल्यान्डलाई 'हेट मेसेज'को वर्षा, ज्यान मार्ने धम्की
एसडिपीको नयाँ 'आप्रवासी नीति'ले फिनिस राजनीति तरङ्गितः के छ आप्रवासी नेताको मत?
हेलसिन्की-तालिन सुरुङ रेलमार्गको चर्चा फेरी सुरू, निर्माण सम्पन्न भए हुनेछ 'गेम चेन्जर'
समुद्रमा तैरिने सहर: यस्ता छन् फिनल्यान्डमा बनेका संसारकै सबैभन्दा ठुला पानीजहाज
प्रिय पाठक, हाम्रो 'सहयोगी सदस्य' बनी हाम्रो कामलाई सघाउनुहोस्। साथै हाम्रा सबै प्रिमियम सामाग्री पढ्नुहोस्।
