संक्षेपमा
- सन् २०६० सम्ममा औसत पेन्सन २२०० युरो पुग्ने इटीकेको (ETK) प्रक्षेपण।
- शीर्ष १० प्रतिशतको पेन्सनमा अन्यको तुलनामा तीव्र वृद्धि देखिने।
- रोजगारी अवधि छोटो हुँदा आप्रवासीको पेन्सन रकम स्थानीयको भन्दा न्यून।
फिनल्यान्डमा आगामी वर्षहरूमा पेन्सन रकम क्रमिक रूपमा बढ्दै जाने नयाँ प्रक्षेपण सार्वजनिक भएको छ। हेलसिन्कीस्थित फिनिस पेन्सन केन्द्र (ETK) ले सोमबार सार्वजनिक गरेको तथ्यांकले भविष्यको पेन्सन अवस्थाबारे महत्त्वपूर्ण जानकारी दिएको हो।
हाल फिनल्यान्डमा औसत पेन्सन मासिक करिब १७०० युरो रहेको छ। यस्तै सबैभन्दा धेरै पेन्सन बुझ्ने शीर्ष १० प्रतिशतले मासिक ३३०० युरो पेन्सन प्राप्त गरिरहेका छन्।
इटीकेको तथ्यांकअनुसार सन् २०६० सम्ममा औसत पेन्सन करिब २२०० युरो पुग्नेछ। उच्च पेन्सन बुझ्नेहरूको रकम भने ४१०० युरो पुग्ने अनुमान छ।
यी सबै हिसाबहरू सन् २०२५ को मुद्रास्फीति दरमा आधारित हुन्।
सन् २१०० सम्ममा औसत पेन्सन ३००० युरो नाघ्नेछ। शीर्ष १० प्रतिशतको पेन्सन ६००० युरोभन्दा बढी पुग्ने प्रक्षेपण गरिएको छ।
प्रक्षेपित पेन्सन रकम
बढ्नेछ आर्थिक असमानता
तथ्यांकले भविष्यमा पेन्सन पाउनेहरूबीच आर्थिक असमानता भने केही बढ्ने देखाएको छ। उच्च पेन्सन पाउनेहरूको रकम अन्य समूहको तुलनामा छिटो बढ्नेछ। पेन्सनको भिन्नता मुख्यतया कामको अनुभव र कमाइमा आधारित हुने गर्छ।
राष्ट्रिय पेन्सन र ग्यारेन्टी पेन्सनले यो अन्तरलाई केही हदसम्म कम गर्छन्। तर समयसँगै यसको प्रभाव घट्दै जाने इटीकेले जनाएको छ।
भविष्यमा आप्रवासी पेन्सनवालाको संख्या बढ्ने भएकाले पनि पेन्सन अन्तर फराकिलो हुनेछ।
आप्रवासीहरूको पेन्सन स्थानीय नागरिकको तुलनामा औसतमा कम हुने देखिएको छ। आप्रवासीहरूको रोजगारी ढिलो सुरु हुनु र समग्र रोजगारी दर कम हुनु यसको मुख्य कारण हुन्।
फिनल्यान्डको पेन्सन प्रणाली मुख्यतया दुई भागमा बाँडिएको छ। पहिलो रोजगारमा आधारित पेन्सन (Työeläke) हो भने दोस्रो राष्ट्रिय वा ग्यारेन्टी पेन्सन (Kansaneläke / Takuueläke) हो। रोजगारमा आधारित पेन्सन व्यक्ति जहाँ बसेपनि प्राप्त गर्छ भने सरकारी ग्यारेन्टी पेन्सनका लागि भने फिनल्यान्डमै बस्नुपर्ने नयाँ प्रावधान छ।
रोजगारमा आधारित पेन्सन व्यक्तिले आफ्नो जीवनकालमा गरेको कमाइबाट जम्मा हुन्छ। आप्रवासीहरू फिनल्यान्ड आएपछि मात्र उनीहरूको यहाँको रोजगार पेन्सन सुरु हुन्छ।
त्यसैले, उनीहरूको काम गर्ने वर्षहरू कम हुने हुँदा समग्र पेन्सन रकम पनि स्थानीय फिनिस नागरिकको भन्दा कम हुन्छ। यद्यपि, पेन्सन अपर्याप्त भएको खण्डमा राज्यले न्यूनतम जीवनयापनका लागि ग्यारेन्टी पेन्सन उपलब्ध गराउँछ।
