📺 नेपालीलाइनेनका भिडियोहरू अब YouTube मा हेर्नुहोस्।
▶️ Let's Go.संक्षेपमा.
- फिनल्यान्डको सीमामा रुसले सैन्य उपस्थिति बढाउनु अपेक्षित।
- फिनल्यान्ड शान्त र सचेत छ। फिनल्यान्डको सेना ठूलो र शक्तिशाली छ।
- युक्रेनमा आक्रमण गरेर राष्ट्रपति पुटिनले ठूलो रणनीतिक र सामरिक गल्ती गरे।
फिनल्याण्डका राष्ट्रपति अलेक्जेन्डर स्टबले फिनल्याण्ड-रुस सीमामा भइरहेको रुसी सैन्य गतिविधिलाई “सामान्य” र अपेक्षित भनेका छन्। उनले फिनल्याण्ड शान्त, संयमित र सचेत रहेको र सीमा पूर्ण नियन्त्रणमा रहेको बताएका छन्। राष्ट्रपति स्टबले युक्रेनमाथिको आक्रमणलाई रुसी राष्ट्रपति भ्लादिमिर पुटिनको “ठूलो रणनीतिक र सामरिक गल्ती” को संज्ञा दिँदै यसले पुटिनले चाहेको भन्दा उल्टो परिणाम दिएको बताएका छन्।
अमेरिकी सञ्चारमाध्यम सिएनएनसँगको अन्तर्वार्तामा राष्ट्रपति स्टबले भने, “हामी फिनल्याण्डका नागरिक शान्त, संयमित र सचेत छौं। हाम्रो सीमा पूर्ण नियन्त्रणमा छ। रुसले हाम्रो सीमामा सधैं सैन्य अखडाहरू राखेको छ, र हामीले अहिले देखेको कुरा सामान्य वृद्धि हो।” उनले युक्रेन युद्ध सुरु हुँदा लेनिनग्राद सैन्य जिल्लाबाट चार ब्रिगेड सारिएको र युद्ध सकिएपछि पुनः सैन्य उपस्थिति बढ्ने अपेक्षा गरिएको बताए।
राष्ट्रपति स्टबका अनुसार रुसले सिमामा जे गरिरहेको छ त्यो एक दीर्घकालीन परिवर्तनको हिस्सा हो। यसको कारण स्पष्ट पार्दै उनले भने, “फिनल्याण्डसँग युरोपको सबैभन्दा ठूलो सेनाहरू मध्ये एक छ। यसका अतिरिक्त, हाम्रो नेटो सदस्यताले रुससँग नेटोको सिमाना दोब्बर बनाएको छ। त्यसैले, रुसी दृष्टिकोणबाट, यो एक स्वाभाविक प्रतिक्रिया हो।”
फिनल्याण्डमा अनिवार्य सैन्य सेवा रहेको र करिब ९ लाख पुरुष तथा महिलाले तालिम पूरा गरेको उनले जानकारी दिए। फिनल्याण्डसँग ६० भन्दा बढी एफ/ए-१८ लडाकु विमान रहेको र हालै ६४ वटा एफ-३५ विमान खरिद गरिएको छ। फिनल्याण्डसँग युरोपकै सबैभन्दा ठूलो तोपखाना रहेको पनि उनले उल्लेख गरे। “हामीसँग यो सबै भएको स्विडेनको चिन्ताले होइन,” उनले भने, “हामीसँग यो सबै हुनुको कारण रुसविरुद्ध विश्वसनीय प्रतिरोधात्मक क्षमता निर्माण गर्नका लागि हो।”
नेटो विस्तारले पुटिनलाई युक्रेन आक्रमण गर्न उक्साएको भन्ने तर्कलाई खण्डन गर्दै राष्ट्रपति स्टबले दुईवटा कुरा अघि सारे। पहिलो, यदि पुटिनले युक्रेनमा आक्रमण नगरेको भए फिनल्याण्ड नेटोमा सामेल नहुने उनको भनाइ थियो। दोस्रो, उनले पुटिनले हालैको सैन्य इतिहासमा सबैभन्दा ठूलो रणनीतिक र सामरिक गल्ती गरेको बताए।
“उनले युक्रेनी सेनाको शक्ति र प्रतिरोध क्षमतालाई कम आँके,” स्टबले भने, “उनले आफ्नै सेनाको क्षमतालाई बढी आँके। र उनले पश्चिमाहरूको एकता र संकल्पलाई पूर्ण रूपमा गलत ठाने।”
पुटिनले युक्रेनलाई रुसी बनाउन खोजेको तर युक्रेन थप युरोपेली बनेको, युरोपेली संघलाई विभाजित गर्न खोज्दा संघ झन् एकताबद्ध भएको र नेटोलाई कमजोर पार्न खोज्दा स्विडेन र फिनल्याण्डजस्ता तटस्थ देशहरू नेटोमा सामेल भएको स्टबको विश्लेषण छ।
यस्तो थियो अन्तर्वार्ता
राष्ट्रपति पुटिन फिनल्याण्डको सिमानामा आफ्नो सैन्य शक्ति बढाउँदै छन्। त्यहाँ अहिले उनले के गर्दै छन्? अहिले त्यहाँ के भइरहेको छ?
हामी फिनिसहरू शान्त, स्थिर र संयमित छौं। हाम्रो सिमाना पूर्ण नियन्त्रणमा छ। रुसले सधैं हाम्रो सिमानामा सैन्य अड्डाहरू राख्दै आएको छ। हामीले देखिरहेको कुरा मूलतः सामान्य सैन्य विस्तार हो।
तपाईंलाई याद होला कि युक्रेनमा युद्ध सुरु हुँदा लेनिनग्राद मिलिटरी डिस्ट्रिक्टबाट चार ब्रिगेडहरू सारिएका थिए। हाम्रो अपेक्षा के छ भने युद्ध समाप्त भएपछि त्यहाँ फेरि सैन्य विस्तार हुनेछ, र त्यो जारी रहनेछ।
त्यसो भए तपाईं भन्दै हुनुहुन्छ कि यो दीर्घकालीन परिवर्तनको हिस्सा हो?
बिल्कुल त्यही हो। र यसको कारण धेरै सरल छ। फिनल्याण्ड युरोपमा टर्की, युक्रेन र पोल्याण्डसँगै सबैभन्दा ठूलो सैन्य शक्ति भएको देशहरूमध्ये एक हो। त्यसमाथि हाम्रो नेटो सदस्यताले रुससँगको नेटो सिमाना दोब्बर बनाएको छ। त्यसैले रुसी दृष्टिकोणबाट हेर्दा यो एक स्वाभाविक प्रतिक्रिया हो।
हामीकहाँ अनिवार्य सैन्य सेवा छ। करिब ९००,००० पुरुष र महिलाहरूले यो पूरा गरेका छन्। हामीसँग ६० भन्दा बढी F/A-18 विमानहरू छन्। हामीले भखरै ६४ F-35 विमानहरू खरिद गरेका छौं। फिनल्याण्डसँग पोल्याण्डसँगै युरोपकै सबैभन्दा ठूलो तोपखाना पनि छ। र मैले प्रायः भन्ने गरेझैं हामीले यो सबै गरेको स्विडेनका कारण गरेको होइन। हामीसँग यी सबै कुराहरू रुसविरुद्ध विश्वसनीय निवारक/deterrent सिर्जना गर्नका लागि छन्।
तर तपाईंहरूको रुससँग सबैभन्दा लामो सिमाना छ र अहिले नेटो सदस्य हुनुहुन्छ। ती व्यक्तिहरूलाई तपाईं के भन्नुहुन्छ जसले नेटो विस्तारलाई देखाएर पुटिनको आक्रमणलाई व्याख्या गर्छन् वा क्षमा दिन्छन्?
यसको सम्भवतः दुई उत्तर छन्। पहिलो, मलाई लाग्दैन कि पुटिनले युक्रेनमाथि आक्रमण नगरेको भए फिनल्याण्ड नाटोमा सामेल हुन्थ्यो। फिनल्याण्ड र युक्रेन निश्चय नै धेरै फरक अवस्थाहरू र फरक इतिहास भएका छन्।
दोस्रो, मेरो विश्वास छ कि पुटिनले हालका सैन्य इतिहासमा सबैभन्दा ठूलो रणनीतिक र सामरिक गल्तीहरूमध्ये एक गरे। उनले युक्रेनी सेनाको शक्ति र लचिलोपनलाई कम आँके। उनले आफ्नै सेनाको क्षमतालाई बढी आँके। र उनले पश्चिमी देशहरूको एकता र दृढताको पूर्णतया गलत मूल्यांकन गरे।
उनले के गर्न खोजिरहेका थिए? उनले युक्रेनलाई रुसी बनाउन चाहन्थे—तर त्यसको सट्टा युक्रेन अझ बढी युरोपेली बन्यो। उनले युरोपेली संघलाई विभाजित गर्न खोजे— तर मैले यसलाई यति एकजुट पहिले कहिल्यै देखेको थिइनँ। उनले ट्रान्सअटलान्टिक गठबन्धनलाई विभाजित गर्न र नेटोलाई कमजोर पार्ने लक्ष्य राखेका थिए, तर त्यसको सट्टा उनले स्विडेन र फिनल्याण्ड जस्ता तटस्थ देशहरूलाई नेटोमा सामेल हुन धकेले।
त्यसो भए अन्ततः तपाईं भन्दै हुनुहुन्छ कि उनले जे गरे त्यो—
हो, एक विशाल गल्ती थियो।
नेपालीलाइनेनबाट थप:
निर्मल पुर्जाको मृत्युपछि पूर्व मिस फिनल्यान्डलाई 'हेट मेसेज'को वर्षा, ज्यान मार्ने धम्की
एसडिपीको नयाँ 'आप्रवासी नीति'ले फिनिस राजनीति तरङ्गितः के छ आप्रवासी नेताको मत?
हेलसिन्की-तालिन सुरुङ रेलमार्गको चर्चा फेरी सुरू, निर्माण सम्पन्न भए हुनेछ 'गेम चेन्जर'
समुद्रमा तैरिने सहर: यस्ता छन् फिनल्यान्डमा बनेका संसारकै सबैभन्दा ठुला पानीजहाज
प्रिय पाठक, हाम्रो 'सहयोगी सदस्य' बनी हाम्रो कामलाई सघाउनुहोस्। साथै हाम्रा सबै प्रिमियम सामाग्री पढ्नुहोस्।
