📺 नेपालीलाइनेनका भिडियोहरू अब YouTube मा हेर्नुहोस्।
▶️ Let's Goनेपाली चलचित्र ‘शाम्बाला’ले फिनल्यान्डको साम्माती फिल्म फेस्टिभल (Sammatti Film Festival) मा आफ्नो पहिलो प्रदर्शन (प्रिमियर) गर्ने भएको छ।
फेस्टिभलको समापन चलचित्रको रूपमा आज ७ सेप्टेम्बरका दिन साँझ १८:५० मा देखाइने उक्त चलचित्र प्रदर्शनमा विशेष अतिथिको रूपमा सहभागी हुन निर्देशक मीनबहादुर भाम पनि फिनल्यान्ड आइपुगेका छन्।
फिनल्यान्डको लोह्या सहरमा आयोजित उक्त फिल्म फेस्टिभल हिजो शनिवार र आज आइतबार दुई दिन चल्नेछ। उक्त फेस्टिभलमा विश्वका विभिन्न मुलुकबाट ल्याइएका चलचित्रहरू देखाइनेछ।
आयोजकले शाम्बाला चलचित्रलाई फेस्टिभलको विशेष आकर्षणको रूपमा प्रचार गरेको छ भने निर्देशक भामलाई विशेष अतिथिको दर्जा दिँदै अतिथि सूचिको पहिलो नम्बरमै राखेको छ।
टिकटको मुल्य १२ युरो राखिएको छ, जुन यो लिङ्क मार्फत खरिद गर्न सकिनेछ।
शाम्बाला नेपालको तर्फबाट ओस्कार अवार्डका लागि समेत सिफारिस भएको थियो। यसलाई नेपालकै सबैभन्दा महँगो लगानीमा बनेको चलचित्र पनि भन्ने गरिन्छ।
कस्तो फिल्म हो शाम्बाला?
शाम्बाला हिमाली भेगकी गर्भवती महिला पेमाले व्यापारका लागि ल्हासातिर हराएका आफ्ना पतिको खोजीका क्रममा भोगेका अनुभव समेटिएर बनाइएको चलचित्र हो। चलचित्रलाई डोल्पाको ४२ सयदेखि ६ हजार मिटरको उचाइमा खिचिएको छ ।
टिबेटियन र नेपाली भाषामा तयार पारिएको चलचित्रमा थिन्ले ल्हामो, सोनम तोपदेन, कर्मा शाक्य लगायतका कलाकारको अभिनय रहेको छ। पहिले ‘चिसो बर्ष’ नाम राखिएको चलचित्रको नाम पछि परिवर्तन गरिएको थियो।
सन् २०२४ मा बनेको यो चलचित्रले अन्तर्राष्ट्रिय स्तरमा ठुलो चर्चा कमाएको छ। यसले बर्लिन फिल्म फेस्टिभलको प्रतिष्ठित ‘गोल्डेन बेयर’ अवार्डका लागि प्रतिस्पर्धा गर्ने पहिलो नेपाली चलचित्र बनेर इतिहास रचेको थियो। नेपाल मात्र हैन दक्षिण एसियाबाटै दसकौं पछि उक्त अवार्डका लागि छानिने चलचित्र बनेको थियो।
शाम्बाला नेपालको तर्फबाट ओस्कार अवार्डका लागि समेत सिफारिस भएको थियो। यसलाई नेपालकै सबैभन्दा महँगो लगानीमा बनेको चलचित्र पनि भन्ने गरिन्छ।
को हुन् निर्देशक भाम?
निर्देशक मिनबहादुर भाम थोरै तर अर्थपूर्ण चलचित्र बनाउने निर्देशकका रुपमा ख्याति कमाएका नेपाली चलचित्र निर्देशक हुन्। उनी नेपालको मुगु जिल्लामा जन्मेर त्यतै हुर्केका हुन्।
यसअघि उनको लघु चलचित्र ‘बाँसुली’ (२०१२) भेनिस फिल्म फेस्टिभलमा पुग्ने पहिलो नेपाली चलचित्र बनेको थियो भने ‘कालो पोथी’ (२०१५) ले भेनिस क्रिटिक्स विकमा FEDEORA अवार्ड जित्दै नेपालबाट ओस्करका लागि आधिकारिक प्रवेश पाएको थियो।
‘शाम्बाला’ उनको दोस्रो फिचर फिल्म हो। बौद्ध दर्शन र राजनीतिशास्त्रमा स्नातकोत्तर गरेका भामले हाल मानवशास्त्रमा विद्यावारिधि गर्दैछन्।
नेपालीलाइनेनबाट थप:
निर्मल पुर्जाको मृत्युपछि पूर्व मिस फिनल्यान्डलाई 'हेट मेसेज'को वर्षा, ज्यान मार्ने धम्की
एसडिपीको नयाँ 'आप्रवासी नीति'ले फिनिस राजनीति तरङ्गितः के छ आप्रवासी नेताको मत?
हेलसिन्की-तालिन सुरुङ रेलमार्गको चर्चा फेरी सुरू, निर्माण सम्पन्न भए हुनेछ 'गेम चेन्जर'
समुद्रमा तैरिने सहर: यस्ता छन् फिनल्यान्डमा बनेका संसारकै सबैभन्दा ठुला पानीजहाज
प्रिय पाठक, हाम्रो 'सहयोगी सदस्य' बनी हाम्रो कामलाई सघाउनुहोस्। साथै हाम्रा सबै प्रिमियम सामाग्री पढ्नुहोस्।
