📺 नेपालीलाइनेनका भिडियोहरू अब YouTube मा हेर्नुहोस्।
▶️ Let's Go.संक्षेपमा.
- फिनल्यान्डमा बुबाहरूलाई पहिलो पटक राजकीय तक्मा प्रदान गरिने।
- एस्टोनिया, आइसल्यान्ड, नर्वे र स्वीडेनमा पनि आज बुवा दिवस।
- फिनल्यान्डमा रहेका नेपाली र अन्य आप्रवासी बुबाहरूको पनि हुनेछ कदर।
फिनल्यान्डमा आज नोभेम्बर महिनाको दोस्रो आइतबार राष्ट्रिय बुवा दिवस अर्थात् बुबाको मुख हेर्ने दिन मनाइँदै छ। यो वर्ष राष्ट्रपति अलेक्जेन्डर स्टबले पहिलो पटक ४८ जना बुबालाई राष्ट्रिय सम्मान पनि प्रदान गर्दै छन्।
यो दिन फिनल्यान्डमा आधिकारिक झन्डा दिवस अर्थात् राष्ट्रिय झन्डा फहराउने दिन पनि हो।
राष्ट्रपति स्टबले आज राष्ट्रपति दरबारमा हुने विशेष समारोहमा ४८ बुबालाई ‘सुओमेन भाल्कोइनेन रुसु’ (Order of the White Rose of Finland) को प्रथम श्रेणीको पदक (गोल्डेन क्रस सहित) प्रदान गर्नेछन्।
यो सम्मान उनीहरूले बालबालिकाको पालनपोषण र शिक्षामा पुर्याएको योगदानको कदर स्वरूप दिइएको हो।
फिनल्यान्डमा बुबाहरूले यस्तो राजकीय तक्मा पाएको यो पहिलो पटक हो। यसअघि सन् १९४६ देखि आमाहरूलाई मात्र आमा दिवसमा यस्तो सम्मान दिइँदै आएको थियो।
फिनल्यान्डमा सन् २०१९ देखि बुवा दिवसलाई पनि आमा दिवस सरह आधिकारिक झन्डा दिवसको मान्यता दिइएको थियो। आजको यो सम्मानले लैंगिक समानतामा थप बल पुर्याएको छ।
फिनल्यान्डमा बुबाको मुख हेर्ने दिनमा परिवारले मिठा परिकार खाँदै सँगै समय बिताउने चलन छ। बालबालिकाहरूले बुबालाई ओछ्यानमै बिहानको खाजा, हातले बनाएका कार्ड र उपहार दिन्छन्। सँगै हिँड्न जाने वा साउना जाने प्रचलन पनि छ।
बुबा बितेकाहरूले आफ्ना बुबाको चिहानमा गई पुष्प गुच्छा राखिदिने चलन पनि छ।
फिनल्यान्डसँगै आज इस्टोनिया, आइसल्यान्ड, नर्वे र स्विडेनमा पनि बुवा दिवस मनाइँदै छ।
आप्रवासी समुदायले पनि अँगालेको संस्कृति
फिनल्यान्डमा रहेका आप्रवासीहरूले पनि यो पर्व मनाउने गरेका छन्। उदाहरणका लागि नेपालीहरूका लागि आफ्नै बुबाको मुख हेर्ने दिन भएपनि फिनल्यान्डमा बस्ने नेपाली आप्रवासीहरूले फिनल्यान्डको बुबाको मुख हेर्ने दिन पनि मनाउने गरेका छन्।
सोही अनुसार नेपाली तथा अन्य आप्रवासी समुदायले आज आ-आफ्ना बुबाहरूलाई सम्झिने छन्। उनीहरूको कडा परिश्रम, संघर्ष, र परिवारप्रतिको मायाको लागि यो दिवसमा उनीहरूलाई विशेष सम्मान, माया, उपहार र मिठो भोजन प्रदान गरिने छ।
घरबाट टाढा हुने र दिनैभरी काममा खटिने बुबाहरूका लागि भने यो दिन खल्लो हुनेछ।
नेपालीलाइनेनबाट थप:
निर्मल पुर्जाको मृत्युपछि पूर्व मिस फिनल्यान्डलाई 'हेट मेसेज'को वर्षा, ज्यान मार्ने धम्की
एसडिपीको नयाँ 'आप्रवासी नीति'ले फिनिस राजनीति तरङ्गितः के छ आप्रवासी नेताको मत?
हेलसिन्की-तालिन सुरुङ रेलमार्गको चर्चा फेरी सुरू, निर्माण सम्पन्न भए हुनेछ 'गेम चेन्जर'
समुद्रमा तैरिने सहर: यस्ता छन् फिनल्यान्डमा बनेका संसारकै सबैभन्दा ठुला पानीजहाज
प्रिय पाठक, हाम्रो 'सहयोगी सदस्य' बनी हाम्रो कामलाई सघाउनुहोस्। साथै हाम्रा सबै प्रिमियम सामाग्री पढ्नुहोस्।
